Shërbimi i vendosjes së protezave falas po shtrihet hap pas hapi në të gjithë vendin. Kështu njofton Ministria e Shëndetësisë sipas së cilës pas Tiranës, Vlorës, Fierit, Durrësit dhe Elbasanit, protezat ortopedike ofrohen tashmë falas, për të gjithë pacientët që kanë nevojë, edhe në spitalin Rajonal të Shkodrës. Në këtë mënyrë, të gjithë pacientët e Shkodrës, por edhe të zonave përreth, që kanë nevojë për këtë shërbim mjekësor mund ta marrin atë pranë vendlindjes së tyre, tërësisht falas dhe me cilësi tepër të lartë.
Ministri i Shëndetësisë Ilir Beqaj, i shoqëruar edhe nga deputeti i Partisë Socialiste Namik Kopliku, ishte në spitalin Rajonal të kryeqendrës së Veriut, ku u takua me mjekët ortopedë të këtij spitali si dhe u njoh me ecurinë e procesit.
Beqaj u shpreh se ofrimi i proteza ortopedike është një shërbim, në radhë të parë, për pacientët që mund ta marrin atë pranë vendbanimit të tyre, tërësisht falas por është një ndihmë e madhe edhe për mjekët, të cilët mund të ushtrojnë në mënyrë të plotë profesionin e tyre.
“Fakti që në spital ka filluar të ketë një furnizim me këto materiale mjekësore të nevojshme, qoftë për traumat, por edhe probleme të tjera ortopedike, e zgjeron gamën e shërbimeve që ofrohen në spital. Sigurisht që, besoj se në radhë të parë, është shërbim për qytetarët, qoftë që marrin shërbimin në Shkodër, qoftë edhe që nuk u duhet më të futin dorën në xhep sepse këto kanë kushtuar, dhe jo pak. E dyta, edhe vetë mjekët e ushtrojnë në mënyrë të plotë profesionin e tyre. Besoj se e rëndësishme është edhe normalizimi i marrëdhënieve mjek-pacient”, u shpreh Beqaj.
Kreu i Shëndetësisë bëri të ditur gjithashtu se tashmë proteza ortopedike falas, për të gjithë pacientët që kanë nevojë, ofrohen sot në disa spitale në vend. “Vendosëm që edhe në 5-6 spitale ku ka ortopedë që mund ta ushtrojnë, kështu që, Shkodra i bashkohet sot Vlorës, Elbasanit, Fierit, Durrësit, Lezhës, Gjirokastrës, Sarandës, në mënyrë që shërbimin të mund ta marrin sa më pranë, aty ku jetojnë”, nënvizoi Ministri i Shëndetësisë.
