Në seancën e sotme plenare kanë vijuar akuzat ndërmjet mazhorancës dhe opozitës për abuzime me barnat. I thirrur në interpelancë me kërkesë të Grupit Parlamentar të Partisë Demokratike, Ministri i Shëndetësisë Ilir Beqaj u është përgjigjur akuzave të opozitës. Në fjalën e tij Beqaj hodhi poshtë akuzat e opozitës për abuzime me çështjen e barnave duke theksuar se po u ngushton hapësirat e abuzimeve atyre që i kanë financuar fushatën PD-së.
“Jemi të angazhuar për të luftuar korrupsionit. Nuk ka pasur asnjë kontratë të njëanshme. Nuk ka pasur abuzime me barnat. Thuhet që nuk është kontrolluar farmacia e QSUT. Nuk është e vërtetë, është kontrolluar. E keni marrë dhe rimarr këtë çështje të barnave sa herë ne kemi bërë ndërhyrje radikale në tregun barnave. Sa më shumë ne u ngushtojmë hapësirat abuzive atyre që kanë financuar fushatat tuaja elektorale aq më agresivë bëheni. Halli madh që ju ka zënë ju detyron të nxirrni nga goja absurditete. Edhe me financuesit tuaj ka një çudi se ju kishit lënë aq fatura të pa paguara saqë ata nuk pranonin të furnizonin më. Ne i shlyem të gjitha borxhet.’ u shpreh Beqaj.
