Ministri i Shëndetësisë, Ilir Beqaj mori pjesë dje në Konferencën e Përgjithshme të Agjencisë Ndërkombëtare të Energjisë Bërthamore (ANEA) që po zhvillohet në Vjenë, Austri (14-18 shtator), ku mbajti fjalën në cilësinë e kryetarit të delegacionit shqiptar në këtë organizatë.
Gjatë fjalës së tij, Ministri i Shëndetësisë Ilir Beqaj u shpeh se “Shqipëria ka bashkëpunim të shkëlqyer me Agjencinë dhe deri në shtator 2015, ajo e ka zbatuar me sukses Programin e saj Kombëtar të Bashkëpunimit Teknik në një shkallë të jashtëzakonshme arritjeje prej rreth 95%”.
Midis të tjerash, Beqaj nënvizoi se “bashkëpunimi teknik ka qenë në linjë me prioritetet e zhvillimit kombëtar dhe do të vazhdojë të jetë i tillë duke përfituar mbështetje në disa sektorë të rëndësishëm dhe veçanërisht në atë të kujdesit shëndetësor, por gjithashtu edhe në ato të mjedisit dhe bujqësisë”.
Në panelin e punimeve të pasdites (PACT Side Event) së Konferencës, Ministri Beqaj ishte panelist kryesor në panelin e drejtuar nga Drejtori i Përgjithshëm i kësaj organizate, Dr. Yukiya Amano.
Shqipëria është Zonë Model e Demonstrimit (Model Demonstration Site) të Programit të Veprimit të Agjencisë për Terapinë e Kancerit (PACT), dhe Ministri Beqaj shprehu gatishmërinë e vendit tonë për të vazhduar në këtë drejtim edhe në të ardhmen, duke siguruar panelistët për angazhimin e saj të plotë për përforcimin e mëtejshëm të aktiviteteve të kontrollit të kancerit në vend.
Po ashtu, Beqaj tha se “ne jemi krenarë që një nga projektet e TC-së është përzgjedhur si histori suksesi me emrin: “Më të fuqishëm së bashku – ANEA dhe partnerët e OKB-së punojnë me Shqipërinë për të luftuar kancerin”.
Kreu i shëndetësisë shqiptare foli rreth punës dhe përmirësimit të ndjeshëm të cilësisë dhe sigurisë së shërbimeve të saj të diagnostikimit dhe terapisë së kancerit, duke u shprehu i gatshëm për të ndarë përvojën e fituar në këtë drejtim me shtetet e tjera anëtare. (javanews.al / a.n)
