Deputeti i PS-së, Ilir Beqaj, zbardh procedurat e shkarkimit të presidentit Ilir Meta.
I ftuar në emisionin “Debati në Channel One” të gazetarit Roland Qafoku, Beqaj tha se kjo procedurë do zgjasë 2 muaj, duke mos llogaritur pushimet.
Ato janë: Kërkesë e mbi 35 deputetëve, shqyrtim në komisionin e ligjeve, raport në parlament, ngritje të komisionit hetimor, debat në parlament, votim për shkarkim dhe vendim i Gjykatës Kushtetuese.
Ajo që bie në sy është se Partia Socialiste po përgatitet të ngrejë një komision të posaçëm hetimor ndaj presidentit Meta, i pari në historinë e shtetit shqiptar dhe po për herë të parë një president do thirret në komision.
Më poshtë sqarimi i plotë i Ilir Beqaj për të gjitha hapat që do ndjekë mazhoranca për shkarkimin e Metës.
Ilir Beqaj: Procesi i shkarkimit të një presidenti është i gjatë. Dhe në rastin e presidentit Meta kështu pritet. Domethënë përveç rezolutës sot që ishte një akt i parë politik, ne kemi filluar procesin e mbledhjes së firmave.
Ditën e hënë kërkesa e të paktën 35 deputetëve dhe në mos gaboj sot janë firmosur ose 50 ose 51. Kjo kërkesë do ti bëhet publike kryetarit të seancës. Seanca e radhës është të hënën. Kryetari i Kuvendit ia dërgon Komisionit të Ligjeve, i cili brenda 15 ditëve i duhet të hartojë një raport. Mund ta hartojë edhe më shpejt. Ndërkohë brenda kësaj periudhe pala e interesuar ka të drejtë të dëgjohet.
Domethënë Komisioni i Ligjeve ka për detyrë ta thërrasë presidentin e Republikës. A vjen apo nuk vjen ai kjo është çështje tjetër. Pas 15 ditëve ky komision do hartojë një raport. Pastaj ka prapë debat në seancë parlamentare. Pas kësaj, nëse pas atij debati na mbushet mendja, ngrejmë komisionin hetimor i cili ka kohën e vet. Të gjithë këto gjëra duan jo më pak se dy muaj. Pushimet e verës na kapin në mes.
Se si shkon komisioni hetimor pastaj nuk e them dot. Komisionet hetimor kanë historitë e tyre. Dhe pas kësaj vihet në seancë dhe vihet në votim. Deri ditën që Gjykata Kushtetuesë nuk e gjykon këtë çështje, presidenti vazhdon detyrën.
/a.r
