Aksident me pasojë një person të plagosur rëndë është regjistruar ditën e sotme në qytetin e Korçës.
Ngjarja ka ndodhur në aksin rrugor Korçë-Pogradec, pranë fshatit Bulgarec, ku shtetasi K.B, duke drejtuar mjetin tip “Benz”, ka përplasur shtetasin B.D, rreth 70 vjeç, banues në fshatin Biranj, i cili po lëvizte në rrugë me biçikletë.
Menjëherë pas aksidentit i moshuari është dërguar për ndihmë mjekësore në Spitalin e Korçës ku mësohet se ndodhet në gjendje të rëndë shëndetësore.
Drejtuesi i mjetit, u shoqërua në Komisariat për veprime të mëtejshme proceduriale.
Grupi hetimor po punon për të përcaktuar shkaqet e aksidentit dhe zbardhjen e rrethanave të ngjarjes.
