Protesta e shtatë e organizuar nga Partia Demokratike, e cilësuar si “kombëtare”, nuk arriti të përmbushte pritshmëritë për të përfaqësuar vullnetin e gjerë popullor, sipas një analize të bërë nga Ben Andoni në “Ora News”.
Ndryshe nga pretendimet, tubimi shihet më shumë si një përmbushje e objektivave të brendshme të partisë sesa një lëvizje qytetare masive.
“Është pyetje e madhe të përfaqësohet populli. Populli përfaqësohet siç u përfaqësua në Hungari, që morën pjesë mbi 75% e popullit që mori pjesë në zgjedhje.
Atëherë përfaqësohet populli. Ndërsa protesta, siç ju thashë, plotësoi thjesht atë objektivin e vogël të Partisë Demokratike, atë objektiv që ata duan të tregojnë që janë, janë në temp, po ushtrojnë presion ndaj mazhorancës.
Dhe kaq, asgjë më tepër. Po ta shikoni dje ose ditën e sotme, është sikur nuk ka ndodhur fare asgjë, asnjë protestë, asgjë tjetër.
Madje mund të mbahesh mend, për shembull, një protestë e minatorëve ose, nuk e di, e fshatarëve të një zone, të cilët janë bllokuar e kështu, me shumë më pak pjesëmarrës, sesa protesta e djeshme e Partisë Demokratike, për të cilën sakrifikojnë shumë njerëzit e Partisë Demokratike, një pjesë e njerëzve të cilët arrijnë t’i grumbullojnë ata, porse në masë, po ta shikoni me kujdes, ajo e ka humbur fare këtë pjesën, të themi, të masivitetit e të tjera.
Por, kryesorja është që po zhvillohen protesta, kryesorja është që Partia Demokratike po e mban tempin. Vetëm unë jam pak dyshues për këtë që vënë ‘protesta e shtatë kombëtare’.
Mund të thuhet thjesht protesta e shtatë e organizuar e Partisë Demokratike, sepse ‘kombëtare’ do kishte emrin në qoftë se do kishte masivitetin e duhur dhe objektivat e duhur”, u shpreh Andoni.
