Ministri i Drejtësisë Ulsi Manja ka ripërsëritur qëndrimin e qeverisë shqiptare sa i përket kryebashkiakut të Himarës Fredi Beleri, i cili ndodhet në qeli për blerje votash.
Në një prononcim për gazetarët pas takimit me shoqatat e bizneseve të huaja në Shqipëri, Manja tha se çështja e Fredi Belerit i përket drejtësisë.
Sa i përket bllokimit që ka bërë Greqia për Shqipërinë në këtë etapë duke mos firmosur hapjen e kapitujve të vendit tonë me BE-në, ministri Manja theksoi se është besimplotë që Athina zyrtare nuk ka për ta penguar rrugën drejt Bashkimit Europian.
Pyetje: Kryebashkiaku i zgjedhur i Himarës po mbahet prej 6 muajsh në paraburgim, ndërkohë që tashmë Greqia duket se ka vendosur veton e parë sa i përket grup kapitujve të parë të cilët pritet të mbahen në Dhjetor. Është konfirmuar dhe nga Kryeministri Mitsotakis. Keni një koment në emër të Qeverisë?
Ministri i Drejtësisë Ulsi Manja: Më duhet të pohoj qëndrimin tonë konstant, Beleri është çështje e drejtësisë. Sigurisht që Greqia ka qëndrimet dhe pretendimet e veta, por kjo është një çështje e drejtësisë. Ky është qëndrimi që kam unë.
Pyetje: A mendoni se është presion deklaratat e vazhdueshme të autoriteteve greke?
Ministri i Drejtësisë Ulsi Manja: Unë nuk besoj se Greqia do të bëhet pengesë për integrimin e Shqipërisë në Bashkimin Europian. Ka një qëndrim të dëshmuar të Greqisë në përkrahjen e Shqipërisë në të gjitha proceset integruese të vendit. Edhe kësaj radhe kam bindjen që Greqia nuk do të jetë penguese në procesin tonë drejt BE-së.
Pyetje: E bëri me Maqedoninë e Veriut.
Ministri i Drejtësisë Ulsi Manja: E bëri për Maqedoninë e Veriut, por me Shqipërinë marrëdhëniet tona me Greqinë dhe qëndrimi i Greqisë në raport me Shqipërinë në gjithë këtë trajektoren tonë drejt BE sigurisht ka qenë pozitive.
/a.r
