Presidenti i Republikës, Bajram Begaj ka uruar për ditëlindje ish-Presidentin Alfred Moisiu. Begaj shprehet në mesazhin e tij se në rrugëtimin historik të shtetit shqiptar, Presidenti Moisiu ka dhënë kontribute të shumta e të çmuara, për të cilat populli shqiptar e vlerëson me konsideratë të lartë.
Kreu i Shtetit e cilëson më tej ish-Presidentin Moisiu model frymëzues për autoritetet shtetërore dhe politike shqiptare.
“I dashur President Moisiu,
Kam kënaqësinë e veçantë që, me rastin e ngjarjes së gëzueshme të 95-vjetorit të datëlindjes Suaj, të bashkohem me familjarët, miqtë dhe dashamirësit Tuaj të shumtë për t’Ju transmetuar urimet e mia më të përzemërta për shëndet të plotë, jetë të gjatëdhe aktive.
Në rrugëtimin historik të shtetit shqiptar, Ju, i nderuar President Moisiu, keni dhënë kontribute të shumta e të çmuara, për të cilat populli shqiptar Ju vlerëson me konsideratë të lartë.
Në moshën e adoleshencës Ju u rreshtuat në radhët e Ushtrise Nacional-Çlirimtare të Shqipërisë, për t’u përfshirë më pas nëangazhime të rëndësishme dhe përgjegjësi shumë të larta, duke kulmuar me postin e Presidentit të vendit.
Në çdo hap që keni hedhur, Ju keni shkëlqyer!
Ju kontribuuat me përgjegjësi gjatë ushtrimit të detyrës së Kreut të Shtetit, veçanërisht në kohë zhvillimesh të vështira, por edhe me urtësi, ekuilibër dhe frymë përbashkuese në konsolidimin e demokracisë, shtetit të së drejtës, parimit të të drejtave dhe lirive themelore, si dhe forcimit të imazhit ndërkombëtar tëShqipërisë.
Në këtë jubile mjaft të veçantë, të cilin ju e keni arritur me shumë përkushtim, punë të palodhur e atdhetari shembullore, duke u bërë model frymëzues për autoritetet shtetërore dhe politike shqiptare, është kënaqësi për mua t’Ju drejtohem me urimet më të përzemërta”, shprehet Presidenti Begaj.
Gjigandi Moisi denjon të takojë liliputin Begaj…..