Presidenti i vendit, Bajram Begaj ka përcjellë një mesazh ngushëllimi për ndarjen nga jeta të regjisorit Vladimir Prifti.
Presidenti Begaj e cilëson regjisorin “skulptor të imazhit”, i cili skaliti personazhe të pashlyer nga kujtesa e publikut, për të cilin thotë se është frymëzim për brezat e rinj të kinematografisë shqiptare.
Begaj i ka shprehur ngushëllimet më të thella familjarëve që humbën njeriun e tyre të dashur.
“Sot arti shqiptar humbi një ndër regjisorët më të talentuar dhe Shqipëria një intelektual pa kompromis, Vladimir Priftin.
Do të mjaftonin vetëm dy vepra, ikona të filmit shqiptar, si: “Udha e shkronjave” dhe “Flutura në kabinën time” për t’u përjetësuar emri i tij në plejadën e regjisorëve më të mirë shqiptarë, por vepra e tij përmban edhe shumë realizime filmash të tjerë.
Si skulptor i imazhit, ai skaliti personazhe të pashlyer nga kujtesa e publikut.
Artist, intelektual dhe, mbi të gjitha, njeri që e donte vendin e vet, Vladimir Prifti është frymëzim për brezat e rinj të kinematografisë shqiptare.
I shpreh ngushëllimet e mia më të thella familjarëve”, shkruan Presidenti Bajram Begaj.
/a.r
