Bashkimi Evropian (BE) mbështet fuqishëm marrëveshjen bërthamore me Iranin dhe zbatimin e saj të plotë, tha shefja e diplomacisë evropiane Federica Mogherini.
Duke folur për gazetarët para takimit të sotëm të Këshillit të Punëve të Jashtme të BE-së në Bruksel, Përfaqësuesja e Lartë e BE-së për Marrëdhënie të Jashtme dhe Politika të Sigurisë Mogherini tha se ndër temat kryesore të agjendës do të jenë Libia, Irani dhe rajoni i Saharës.
“Ne mbështesim në mënyrë të fuqishme marrëveshjen bërthamore me Iranin dhe zbatimin e saj në tërësi”, tha Mogherini.
Ajo njoftoi se në kuadër të takimit do të mblidhet edhe me ministrat e jashtme të Francës, Gjermanisë dhe Britanisë për të diskutuar çështjen e Iranit.
“Ne do të diskutojmë se si do të zbatohet në tërësi marrëveshja bërthamore me Iranin, që paraqet një nga gurthemelet e sigurisë në rajonin tonë”, u shpreh Mogherini.
Kryediplomatja e BE-së tha se ekzistojnë po ashtu dallime serioze ndërmjet Iranit dhe BE-së, por shtoi se dialogu në këtë proces ka rëndësi kyçe dhe se është e nevojshme që të shmanget rritja e tensioneve në rajon. /i.h
