Komisioni Evropian ka njoftuar se platformat ChatGPT, Reddit dhe Roblox do t’u nënshtrohen rregullave të Bashkimit Evropian që zbatohen për platformat dhe motorët e kërkimit shumë të mëdhenj online.
Vendimi vjen pasi të tre shërbimet kanë deklaruar se arrijnë të paktën 45 milionë përdorues aktivë në muaj në Bashkimin Evropian, pragu që përcakton klasifikimin e tyre si shërbime “shumë të mëdha.
Sipas Komisionit Evropian, ChatGPT, Reddit dhe Roblox kanë katër muaj kohë nga përcaktimi i tyre për të përmbushur detyrimet shtesë që parashikon legjislacioni evropian.
Ndër të tjera, kompanitë duhet të vlerësojnë dhe të marrin masa për reduktimin e rrezikut të përhapjes së përmbajtjeve të paligjshme përmes shërbimeve të tyre.
Ato gjithashtu duhet të adresojnë efektet e mundshme negative ndaj të miturve, si dhe rreziqet që platformat mund të paraqesin për mirëqenien fizike dhe mendore të përdoruesve.
Rregullat e BE-së kërkojnë gjithashtu që platformat dhe motorët e kërkimit shumë të mëdhenj të kufizojnë rreziqet që lidhen me të drejtat themelore, proceset zgjedhore dhe sigurinë publike.
Komisioni Evropian do të ketë kompetencë për të mbikëqyrur zbatimin e DSA-së dhe do të mund të zhvillojë hetime për të vlerësuar mënyrën se si funksionojnë shërbimet dhe veçoritë e tyre.
Sipas përcaktimit të Komisionit, ChatGPT klasifikohet si motor kërkimi online. Ndërkohë, platforma e lojërave Roblox dhe platforma e diskutimeve Reddit klasifikohen si platforma online, pasi u mundësojnë përdoruesve të shpërndajnë publikisht përmbajtje të palëve të treta.
Klasifikimi i ri i vendos të tre shërbimet përballë kërkesave më të forta të transparencës, vlerësimit të rreziqeve dhe mbikëqyrjes nga autoritetet evropiane.
