Një hetim i fshehtë i BBC-së ka ekspozuar operacionet e një bande të dhunshme kontrabandistësh, e cila transporton njerëz përtej Kanalit Anglez me varka të vogla. Hetimi zbuloi jo vetëm rrjetin në Francën veriore, por gjithashtu dhe bashkëpunëtorët e bandës në Mbretërinë e Bashkuar, të cilët mbledhin pagesa për kalimet e paligjshme.
Një gazetar i BBC-së, i cili u infiltrua duke u paraqitur si emigrant, fitoi akses në strehën e fshehtë të bandës në një pyll pranë Dunkirkut në Francë. Atje, ai bisedoi me një anëtar të lartë të bandës të quajtur Abdullah, i cili i ofroi një vend në një varkë për 1,400 euro. Abdullah po ashtu i dha gazetarit një numër telefoni britanik dhe një fjalë kyçe, “Birmingham”, për pagesën.
Përmes një tjetër gazetari të infiltruar, BBC dëshmoi se si bashkëpunëtorët e bandës në Mbretërinë e Bashkuar veprojnë lirshëm. Një burrë i quajtur Bahman u takua në stacionin e trenit New Street në Birmingham për të mbledhur një zarf me para, duke konfirmuar lidhjen direkte me bandën në Francë. Një tjetër bashkëpunëtor u përball hapur me ekipin e BBC-së, por u largua me shpejtësi.
Struktura e bandës dhe dhuna
Hetimi identifikoi tre udhëheqës kryesorë, të gjithë kurdë irakianë: Jabal, Aram dhe al-Millah. Ata ndryshojnë vazhdimisht emrat e bandës dhe numrat e telefonit për t’i shpëtuar autoriteteve.
Gjatë hetimit, gazetarët zbuluan se banda jo vetëm që është përgjegjëse për vdekjen e të paktën 12 personave, duke përfshirë një vajzë 7-vjeçare, por ushtron dhunë të rëndë edhe ndaj anëtarëve të saj. Një emigrante somaleze, e quajtur Luna, i tha BBC-së se një nga ndihmësit e bandës i kishte vënë një armë në kokë.
Këto zbulime tregojnë vështirësitë që ka policia franceze dhe autoritetet britanike për të ndalur këtë veprimtari kriminale, ndërsa banda vazhdon të jetë “një hap përpara tyre”, siç shprehet një prokuror francez.
