Shërbimet e emergjencës në shumë zona të Evropës Jugore po luftojnë me zjarret që vazhdojnë të përhapen për shkak të temperaturave shumë të larta, sipas BBC.
Vende si Spanja, Portugalia, Italia dhe Greqia po përjetojnë temperatura mbi 40 gradë Celsius, në ditët e fundit.
Temperatura rekord janë shënuar gjithashtu në disa pjesë të Francës dhe Sllovenisë.
Dhjetëra alarme të kuqe janë lëshuar gjithashtu për shkak të të nxehtit, niveli më i lartë i paralajmërimit.
Në Greqi, rreth 5 000 zjarrfikës po merren me flakët pasi më shumë se 152 zjarre të reja shpërthyen në të gjithë vendin në 24 orët e fundit.
Mijëra banorë dhe vizitorë janë zhvendosur në vende të sigurta nga ishujt turistikë të Kiosit dhe Zakinthosit.
Autoritetet në këto vende kanë paralajmëruar se kushtet mund të mbeten të vështira për ditët në vijim.
Në Spanjë, më shumë se 4 000 njerëz u evakuuan gjatë natës në provincën veriperëndimore të León pasi u raportuan rreth 30 zjarre.
Qeveria e vendit ka rritur nivelin e reagimit kombëtar ndaj emergjencave.
Në Portugalinë fqinje, zjarrfikësit luftuan me tre zjarre të mëdha pasi u regjistruan temperatura ekstreme në zonë.
Zyrtarët paralajmëruan se rajonet jugore të vendit mund të arrinin temperaturat maksimale deri në 44 gradë Celsius.
Diku tjetër në Evropë, alarmet për nxehtësi mbeten në fuqi në Francë, Itali dhe Ballkan, me temperatura që pritet të shkojnë mbi 40 gradë Celsius në disa zona.
Shkencëtarët kanë paralajmëruar se ndryshimi i klimës po e bën verën mesdhetare më të nxehtë dhe më të thatë, gjë që po shkakton sezone më të gjata dhe më intensive të zjarreve. //a.i/
