Nëse deri më sot keni menduar se vetëm për makinën duhet paguar sigurim i detyruar, kjo gjë duket se do të ndryshojë, pasi autoritetet shqiptare në bashkëpunim me organizata të huaja financiare, janë duke përgatitur një ligj i cili do të detyrojë familjet që të bëjnë sigurim të detyruar vjetor të pronave të patundshme.
Ky projektligj i cili është në hapat e fundit, ka për synim që t’i hapë rrugë familjeve që pësojnë dëme sidomos nga përmbytjet, që të dëmshpërblehen përmes policave të sigurimit.
Projektligj i propozuar nga Banka Botërore dhe Autoriteti i Mbikëqyrjes Financiare parashikon ngritjen e një skeme të posaçme për sigurimin nga tërmetet dhe përmbytjet, thotë kryetari i Bordit të AMF, Pajtim Melani. Ai pohon se familjet shqiptare do të detyrohen me ligj të sigurojnë banesën nga katastrofat natyrore.
“Ajo çka parashikon ky ligj është krijimi i një pool-i të përbashkët për sigurimin nga katastrofat. Ky pool do të parashikojë primet dhe mënyrën se si do të arkëtohen primet, si dhe do të parashikojë mënyrën se si do të dëmshpërblehet”, thotë z. Melani, kryetar i Bordit të AMF.
