Bayern Munich ka arritur të fitojë për herë të katërt radhazi titullin në Bundesliga.
Gjiganti gjerman, ka mposhtur në udhëtim Ingolstadin me rezultat 2:1 dhe një xhiro para fundit të kampionatit është shpallur kampione e Gjermanisë.
Ka qenë sulmuesi polak, Robert Lewandowski që ka shënuar dy gola të fitores për bavarezët.
Fillimisht në minutën e 15-të, mesfushori francez Franck Ribery u pengua në zonë dhe nga penalltia shënoi Lewandowski.
Ndërkohë polaku golin e dytë në ndeshje dhe të 29-tin këtë edicion e realizoi në minutën e 32-të.
Për vendasit golin e vetëm e shënoi Hartman tre minuta para fundit të pjesës së parë nga penalltia.
Titulli i sivjetmë ishte i 26-ti për Bayernin në Bundesliga, që ka edhe 17 kupa të Gjermanisë.
Ndërkohë Borussia Dortmund ka humbur në udhëtim tek Eintracht Frankfurt 1-0, ndërsa Schalke 04 mposhti 2-1 Augsburgun./a.m.
