Mes politikanëve nuk ka vetëm akuza të forta mes tyre por edhe batuta. Dhe kur vjen fjala për batuta kush më mirë se Nard Ndoka di t’i bëjë ato. E tillë ka qenë situata edhe në mbledhjen e Komisionit të Ligjeve, ku deputeët iu rikthyen punës pas përfundimit të zgjedhjeve vendore.
Në fakt në qendër të debatit ka qenë mënyra e veshjes së deputetëve që sipas kreut të komisionit Fatmir Xhafaj është si “për pushime”.
Në këtë situatë, është rishfaqur duke thumbuar Xhafajn.
Debati në komision
Nard Ndoka: Shumë i lodhur më dukesh, kryetar.
Fatmir Xhafaj: Jo i lodhur, i mërzitur po. Se njëri më vjen në komision me krahë të shkurtra, një tjetër me T-shirt. Mendoj që një këmishë dhe një kollare duhet ta vini, se jeni deputetë.
Nard Ndoka: Jo, po të vijmë me bluzë me numër 23.
Pandeli Majko: Jo, jo, ajo bluzë ishte për në fushatë elektorale.
Fatmir Xhafaj: Po ç’është kjo, ky është institucion. Më erdhi Ristani mbledhjen që kaloi me një bluzë me mëngë të shkurtra.
(Në komision vjen deputeti demokrat, Mhill Fufi)
Bashkim Fino: Ja erdhi figura, edhe ky me mëngë të shkurtra.
Fatmir Xhafaj: Mhillit i lejohet se është opozita. Dhe opozitës i lejohet edhe pa mëngë të shkurtra të vijë.
Dashamir Peza: Nuk mund të vendosen kushte se si të vishemi, nëse nuk ka ndonjë ligj që të na pengojë.
Fatmir Xhafaj: Të enjten vjen ligji për Kodin e Etikës. Por nuk besoj se ka nevojë t’ju mësojmë se si duhet të silleni. Vetëm shqiptarët duan t’i mësosh si të ecin në vijat e bardha.
Bashkim Fino: Ore, nuk të shoh mirë unë ty, vërtet nuk të ka bërë mirë fitorja?
Fatmir Xhafaj: Më ka bërë mirë, por më ka futur në mendime.
