Zbardhet dosja e mega-operacionit që u zhvillua në Elbasan ku ranë në pranga 28 persona mes tyre policë të burgjeve, biznesmenë dhe të dënuar. Në dokumente janë të zbardhura fakte se si të dënuarit në burgun e Drenovës gjatë fundit të vitit 2020 dhe 2021, ata vendosnin baste sportive, organizonin festa me alkool dhe drogë. Festa është organizuar nga i burgosuri Leo Osmani, që kishte arritur nëpërmjet korrupsionit të punonjësve të policisë së burgjeve të fuste alkool dhe dogë në qeli.
Në dokumente theksohet se edhe pse gardianët përgjegjës në atë sektor kanë parë çdo gjë, nuk kanë vepruar për të ndërprerë festën. Sendet e paligjshme, përfshirë edhe ato për zhvillimin e basteve sportive, i ka futur në burg Aleksandër Alibashi, një biznesmen në Vlorë që merrte urdhrat nga Aleksandër Llanaj. Alibashi i ka futur sendet e paligjshme në burg me ndihmën e punonjësit të policisë së burgjeve Ilia Beshollari. Po ashtu sipas dosjes Alibashi i vendoste baste sportive në lokalin në pronësi të tij në qytetin e Vlorës. Llanaj komunikonte më shpesh me të dashurën e tij.
Ajo kujdesej për të vendosur bastet sportive të të dashurit, por edhe shokëve të tij të burgut. Komunikimi, sipas dosjes hetimore, bëhej nëpërmjet numrave telefonikë të ndryshëm. Po ashtu në dokumente thuhet se Veli Bici, kur ushtronte detyrën në burgun e Peqinit, ai bisedon me të dënuarin Arben Grori, ku të cilit dyshohet se i jep informacione në lidhje me kontrollin e dhomave.
Gazment Braka ose Gaxhai, Aleksandër Sinani dhe Arben Grori, nëpërmjet lidhjeve që kishin me gardianët dhe po ashtu nëpërmjet ryshfetit, kanë mbajtur celularë në qelitë e tyre. Sipas dosjes hetimore, punonjësit e policisë në burgun e Peqinit i ndihmonin të dënuarit që të fusnin sende të kundraligjshme dhe t’i fshihnin ata në momentin që kryhej kontroll.
Po ashtu, organi i akuzës në Elbasan bën me dije se punonjësit e policisë në burgun e sigurisë së lartë në Peqin, nuk kanë zbatuar rregulloren dhe nuk kanë kontrolluar qelitë e të dënuarve. Gjithashtu greva e urisë nisi nga Genci Balla, i cili ka shumë ndikim tek të dënuarit e tjerë. Nëpërmjet celularëve të jashtëligjshëm ata dhanë informacion edhe në burgjet e tjera. Ndërsa për sa i përket paraburgimit të Elbasanit, personi kyç ishte Gentjan Gjata cili kishte biznesin brenda këtij institucioni.
Ai kishte kontakte me të paraburgosurit dhe merrte nga ata porosi për të ndryshuar qelitë apo për t’i favorizuar në paraburgim. Gjata në bashkëpunim me Hysni Ndreun me detyrë Shef i Paraburgimit Elbasan, u dërgonin të dënuarve sende që ju duheshin dhe alkool. Shumat e parave sipas përgjimeve varionin nga 200 mijë Lekë osë 300 Euro për të ndryshuar qelinë. 28 të prangosurit pritet të përballen me gjykatën për caktim të masës së sigurisë.
/a.r
