Kombëtarja e Kosovës, pas rezultateve të dobëta në kualifikimet e Eurobasketit, të vitit 2016, në këtë vit zhvilloi ndeshjet parakualifikuese për Kampionatin Botëror “Kina 2019.Ndryshimet e para erdhën me përzgjedhësin, kur në vend të Arben Krasniqit, erdhi trajneri amerikan, Bred Greenberg.
Kosova arriti të përforcohej edhe me basketbollistë si Lis Shoshi, Erijon Kastrati dhe Gëzim Morina, ndërsa pas tërheqjes së Edmond Azemit, shiriti i kapitenit iu dha Dardan Berishës.Pas fazës përgatitore, Kosova nisi aventurën në ndeshjet parakualifikuese, me fitoren e madhe ndaj Maqedonisë 72:68. Kundër vendit fqinj dhe kombëtares që mori pjesë në Eurobasketet e fundit, Kosova ishte madhështore.
Pas fitores së parë, Kosova pësoi dy humbje radhazi si mysafire – ndaj Estonisë dhe Maqedonisë në Shkup. Ndeshja vendimtare, ishte sërish në kryeqytet, kundër Estonisë.
Të udhëhequr nga Dardan Berisha e Lis Shoshi, Kosova bëri mrekullinë, dhe realizoi fitore ndaj Estonisë, 75:69 për të siguruar kualifikimet që është suksesi më i madh i kombëtares së Kosovës, prej kur filloi të luante ndërkombëtarisht.
Pas kualifikimit historik, përfaqësuesja kosovare bën pjesë në grupin C për kualifikimet e Botërorit “Kina 2019”, së bashku me Lituaninë, Hungarinë e Poloninë.
Kombëtarja e Kosovës rrezikonte t’i mos i luante ndeshjet në shtëpi për shkak të palestrës, por me intervenimin e FBK-së, dhe tolerimet e FIBA-s, ndeshjet i zhvilloi në shtëpi.
Kosova aventurën në kualifikuese e nisi ndaj gjigantit evropian dhe botëror, Lituanisë më 24 nëntor në Prishtinë, ku pësoi humbje të thellë me rezultat 61:99. Kosovarët luajtën mirë për një pjesë, por u demoluan në periudhën e tretë.
Edhe në ndeshjen e dytë ndaj Hungarisë, Kosova pësoi humbjen e dytë 84:76, edhe këtu duke luajtur mirë pjesën më të madhet lojës, por duke rënë shumë në periudhën e fundit.Ndeshjet tjera Kosova do t’i luajë gjatë vitit 2018 dhe ende ka gjasa për kualifikim, pasi dy të parat kualifikohen direkt, kurse e treta luan në play-off, përgatiti Koha. (b.an)
