Roger Waters i shkroi një letër të gjatë e të hapur Bon Jovit, duke e kritikuar grupin në prag të koncertit të 3 tetorit në Tel-Aviv. Ish-basisti i “Pink Floydit”, prej kohësh një kundërshtar i qëndrimit të Izraelit karshi Palestinës, i ka akuzuar Jon Bon Jovin dhe shokët e tij të grupit për qëndrim “krah për krah” me Izraelin pa i marrë parasysh humbjet e shumta që i vuajtën palestinezët në duart e Qeverisë izraelite, në një editorial të shkruar për “Salon”.
Waters vazhdimisht u ka bërë thirrje shokëve të tij artistë që të bojkotojnë performancat në Izrael. “Shpesh në të kaluarën u kam shkruar letra të hollësishme dhe ndonjëherë edhe bindëse kolegëve në biznesin e muzikës, duke i inkurajuar ata që të mos i ndihmojnë politikat e aparteidit të Qeverisë izraelite, duke performuar në Izrael”, ka shkruar Waters.
“Me t’i lexuar komentet e Jonit javën e kaluar në ‘Yedioth Ahronoth’, nuk do të humbas kohë duke tërhequr paralele me aparteidin në Afrikën Jugore dhe të mbaj qëndrime morale që aq shumë artistë kanë pasur atëbotë dhe që me mijëra të tjerë po i mbajnë tani karshi dekadave të tëra të shtypjes izraelite të palestinezëve”.
