Kryeministri Edi Rama ka sqaruar vizionin e qeverisë që drejton për kompetencat që duhet të menaxhojnë pas zgjedhjeve 61 kryetarët e rinj të bashkive në vend.
Shefi i qeverisë e ka nisur me atë që nuk duhet të bëhet më si në të shkuarën, kur solli si shembullin më tipik ujësjellësat.
“Ajo që kemi bërë deri tani nuk ka qenë decentralizim, por ka qenë copëtim. Jemi turp i gjallë. Vendi më i pasur me ujë dhe nuk kemi ujë të pijshëm, vuajmë për vaditjen dhe përmbytemi në shi”.
Ujësjellësat, një pjesë e mirë e të cilave të falimentuara, janë problematika më e madhe që do të trazhëgojnë kryebashkiakët e rinj. Ndërkohë, nga 1 janari i vitit 2016, kompetencat dhe përgjegjësitë e tyre do të jenë shumë herë më të mëdha.
Personeli i koptshteve, kujdesit shëndetësor dhe emergjencave civile do të emërohen dhe do të jenë në varësi të pushtetit të ri vendor. Kryebashkiakët e rinj do të kenë gjithashtu përgjegjësinë e dhënies së titujve të pronësisë për tokën bujqësore.
Do t’u jepet fund drejtorive rajonale të bujqësisë në formën ekzistuese: “Janë struktura rajonale komuniste, pa kooperativa bujqësore, merreni me mend se ç’ punë bëjnë”.
Besimi kaq i madh që po i jepet pushtetit vendor do të shoqërohet nga kontroll më i rreptë i qeverisë ndaj të zgjedhurve të rinj të pushtetit vendor, që për kryeministrin nuk duhet të përsëritet më ajo që ndodhi me pyjet dhe kullotat nga krerët e komunave në ikje: “I vunë emrat dhe u shpallën pronarë të pyjeve”.
Ajo që qeveria pret nga reforma e re territoriale dhe ajo decentralizuese, përveç shërbimeve më të mira për qytetarët, është kontrolli mbi territorin. Nga decentralizimi duhet të kalohet në planifikimin e unifikuar urban.
“Planet e rregullimit të territorit u bastarduan nga kryetarët e komunave që dhanë leje ndërtimi pa ruajtur distancën nga rrugët kombëtare”, tha Rama.
