DURRËS- Bashkinë e Durrësit, për një afat të pacaktuar do ta drejtojë Emirjana Sako, një nga nënkryetarët. Një lajm i tillë është konfirmuar nga vetë kryetari aktual Zhuljen Varfaj për Report Tv, i cili ka njoftuar se do t’i nënshtrohet një ndërhyrje kirurgjikale në zemër në Gjermani, e për pasojë do të mungojë për një periudhë kohore derisa të rimarrë veten.
Zhyljen Varfaj mori detyrën pas largimit të kryetares së dalë nga zgjedhjet e 30 qershorit, Valbona Sako. Kjo e fundit u tërhoq nga ky post pas gafës ku u shpreh se “qeveria është e kënaqur që nga tërmeti pati 51 viktima”.
Varfaj është marrë me menaxhimin e situatës pas tërmeti dhe me procesin e rindërtimit në Durrës, një nga zonat më të prekura. Ai ka mbajtur më herët postin e nënkryetarit të Bashkisë së Durrësit dhe mori kompetencat drejtuese të Bashkisë së Durrësit, deri në zgjedhjen e një kryebashkiaku të ri. Shqiptarja.com
