Bashkia e Tiranës do të publikojë një listë me penalitete për individët apo bizneset që hedhin plehra në rrugë, që vandalizojnë objektet publike apo që zaptojnë hapësirat dhe ndërtojnë pa leje. Gjatë prezantimit të administratorit të Njësisë nr. 10, Arian Hamiti, kryetari i Bashkisë së Tiranës, Erion Veliaj, vuri sot theksin në vendosjen e sistemit të ndëshkimeve, sipas të cilit ai që dëmton paguan faturën e dëmit.
“Duke filluar nga nesër, Bashkia e Tiranës do të botojë një listë me sanksione për të gjithë ndotësit e qytetit. Do të ketë një sistem gjobash për individët dhe bizneset që ndotin, si dhe për të gjithë ata që urinojnë në vende publike apo që ndërtojnë pa leje”, deklaroi Veliaj. Kryetari i Bashkisë së Tiranës theksoi se do të marrë fund koha kur qytetarët paguajnë edhe për ata që dëmtojnë dhe vandalizojnë hapësirat publike të qytetit apo për rehabilitimin e zonës ku është ndërtuar pa leje.
“Nëse dikush hedh plehra në rrugë, duhet ta paguajë ai faturën. Nëse dikush vandalizon objektet publike, artistike apo kulturore, si Monumenti i Pavarësisë, duhet të paguajë dëmin. Nëse dikush ndërton pa leje, do të paguajë prishjen e saj, por edhe rikthimin në gjendjen fillestare”, sqaroi Veliaj. Ai tha se Bashkia e Tiranës do të jetë transparente duke komunikuar masat e gjobave. “Po kush hedh plehra në tokë, kush vandalizon objektet publike dhe kush zapton ose ndërton pa leje aty ku territori është publik, do ta paguajë 100% të kostos”, paralajmëroi Veliaj.
Një tjetër çështje e prekur nga kryetari i Bashkisë së Tiranës ishte dhe aksioni për lirimin e hapësirave publike që shumë shpejt do të pasojë në këtë njësi. “Njësia nr. 10 do të jetë njësia e dytë pas njësisë nr. 5 ku do të fillojmë një aksion për lirimin e territoreve, trotuareve e të gjitha hapësirave publike”, deklaroi Veliaj. Sipas tij, vetëm në një javë aksion në njësinë nr. 5 janë 6-fishuar të ardhurat e tatim-taksave të të gjithë qytetit të Tiranës.
“E konsideroj sukses aksionin në Njësinë nr. 5. Liroi territor për qindra dhe mijëra banor, por shtoi me 6-herë të ardhurat ditore të Bashkisë”, deklaroi Veliaj. Më tej, kryetari i Bashkisë vuri theksin në aksionin e paralajmëruar më 4 shtator për pastrimin e Tiranës. “Do u drejtoj një letër të gjithë qytetarëve të Tiranës, ku do t’ju kërkoj të na bashkohen në këtë aksion. Do jetë detyra e çdo njësie që ta koordinojë aksionin me administratën, me kontraktorin që ka përsipër pastrimin e zonës, me shkollat e institucionet e tjera publike”, tha Veliaj.
Pas borxhit miliona dollarë të trashëguar, kryetari i Bashkisë së Tiranës solli në vëmendje një tjetër aksion të suksesshëm për rregullimin e 31 çerdheve që do të mirëpresin të vegjlit në muajin shtator. “Gjetëm një situatë ku borxhi i faturave të prera të Bashkisë është 30 milionë dollarë. Ndaj dhe lançuam nismën “Adopto 1 çerdhe” dhe u jam shumë mirënjohës që 31 kompani kanë adoptuar 31 çerdhe, ndaj do të doja shumë që edhe njësia të kishte një rol aktiv”, deklaroi Veliaj. Sipas tij, kjo është arsyeja pse të shtunën tjetër u ka bërë apel të gjithë qytetarëve që të japin kontribut me disa orë punë në çerdhet e “adoptuara”.
