Këshilli Bashkiak i Lezhës ka refuzuar propozimin e Bashkisë për uljen e pagave të administratës së kësaj njësie vendore. Këshilltarë të majtë e të djathtë votuan kundër, me argumentin se pagesat e punonjësve të administratës duhet të jenë në maksimumin e mundshëm. Në këtë mënyre administrata është më efikase për të qenë në shërbim të qytetareve.
“Një zyrtar duhet të ketë rrogën maksimale, pasi nëse ai e ka pagën e vogël, mund të pranojë pagën dhe do bëjë korrupsion. Ose do të iki nga puna dhe më pas do të zëvendësohet me një të pa aftë”tha Mergerita Trashaj, këshilltare.
Ndërkohë përfaqësuesi i Drejtorisë së Financës në Bashkinë Lezhë thotë se propozimi për uljen e pagave në 5 deri në 7% lidhet me problemet financiare që po kalon kjo njësi vendore.
“Projekti prek vetëm pagat e administratës, jo të punonjësve të nivelit të ulët. Prek vetëm 5-7%, arsyet, sepse bashkia ka një situatë të lëkundur. Trashëgon borxhe që nga viti 2013, por ka probleme edhe mosrealizimi i të ardhurave” tha Xhemal Haxhia, përgjegjës i Financës, Bashkia Lezhë.
Në mbledhjen e këshillit bashkiak të Lezhës u votua edhe emërtimi i një rruge, ajo që lidh lagjen “Nënë Tereza” të qytetit me superstradën. Rrugës iu vendos emri i këshilltarit të ndjerë, Aleksandër Ndoka i cili u nda nga jeta 2 muaj më parë. Propozim erdhi nga këshilltarit Emirjan Lazri, i cili u shpreh se Aleksandër Ndoka ka dhënë një kontribut të jashtëzakonshëm në mbarëvajtjen e këtij këshilli.
“Unë kam një propozim! Duke e ditë për kontributin e madh që ka dhënë për këtë këshill bashkiak, mendoj që rruga kryesore, që lidh superstradën me lagjen “Nënë Tereza”, të marrë emrin e të ndjerit Aleksandër Ndoka” tha Emirjan Lazri.
Më pas mbledhja ka vijuar diskutimet duke miratuar edhe bursat për studentët. Por bursat janë përgjysmuar pasi numri i tyre ishte 40 ndërkohë që kërkesat ishin dyfish, kjo ka bërë që ato të përgjysmohen.
