Autoriteti Kombëtar i Ushqimit (AKU) dhe institucionet homologe izraelite do të intensifikojnë bashkëpunimin në fushën e sigurisë ushqimore, me fokus shkëmbimin e eksperiencave dhe adoptimin e praktikave më të mira ndërkombëtare.
Drejtoresha e përgjithshme e AKU-së, Blerina Gjylameti, priti sot në ambientet e institucionit një delegacion izraelit të kryesuar nga ambasadorja e Izraelit në Shqipëri, Galit Peleg, e shoqëruar nga Oren Lavi, drejtor i përgjithshëm në Ministrinë e Bujqësisë dhe Sigurisë Ushqimore të Izraelit, si edhe Yuval Lipkin, kreu i Administratës së Sigurisë Ushqimore të Izraelit.
Gjatw takimit, Gjylameti theksoi se fokusi ishte bashkëpunimi dypalësh dhe shkëmbimi i eksperiencave për ndërtimin e një modeli sa më efikas në fushën e sigurisë ushqimore.
“Qëllimi ynë është garantimi i standardeve gjithnjë e më të larta të sigurisë ushqimore për konsumatorët, në përputhje me praktikat më të mira ndërkombëtare,” – u shpreh Gjylameti.
Ajo shtoi se AKU është e gatshme të përmbushë objektivat e përbashkëta, duke vënë theksin te rritja e kapaciteteve profesionale, modernizimi i infrastrukturës laboratorike dhe përdorimi i teknologjive të avancuara.
Në një reagim në rrjetet sociale, AKU e cilësoi takimin si “një hap të rëndësishëm për forcimin e marrëdhënieve mes institucioneve të të dy vendeve dhe për rritjen e bashkëpunimit në sektorin e sigurisë ushqimore”.
