Bashkia e Tiranës ka njoftuar marrjen e një sërë masash për përballimin e situatave që mund t’ë vijnë si pasojë e reshjeve të shumta të shiut që priten gjatë 24 orëve të ardhshme.
Bashkia paralajmëron qytetarët të jenë të kujdeshshëm pasimund të ketë bllokime të akseve rrugore.
“Ndërmarrjet e rrugëve, pastrimit, kanalizimeve, ndriçimit, Policia Bashkiake, Inspektorati i Mbrojtjes së Territorit dhe Zjarrfikëset, kanë ngritur grupe të posaçme pune dhe do të jenë në terren në shërbim të qytetarëve gjatë gjithë ditës, së bashku me administratorët e 24 njësive administrative”, thuhet në njoftimin e bashkisë për masat e marra.
Ky institucion këshillon qytetarët që të minimizojnë lëvizjet gjatë të mërkurës, për të shmangur trafikun e rënduar, ndërsa për të lehtësuar transportin ju është kërkuar linjave të transportit publik të shtojnë numrin e autobusëve në qarkullim. Sa i përket rrugëve problematike dhe me mundësi më të lartë për t’u bllokuar, bashkia ka listuar rrugën “Siri Kodra” (segmenti te “Frigoriferi”), pastaj “Don Bosko”, Rruga e Kavajës, “Imer Nregjoni”, rr. “Bardhyl” (segmenti ku kryqëzohet me rr. “Qemal Stafa”), Unaza (segmenti “Vasil Shanto”“21 Dhjetori”), rr. “Myslym Shyri” dhe rruga e Dibrës. Bashkia e Tiranës u bën thirrje qytetarëve që të shmangin kalimin pranë lumenjve në zonat periferike të Tiranës.
“Në raste emergjencash, ju lutemi të kontaktoni Bashkinë e Tiranës në numrin 0800 0888 (nga numrat fiks), Policinë Bashkiake në numrin 04 24 19 465, Zjarrfikëset në numrin 129 ose administratorin e njësisë tuaj administrative”, thuhet në deklaratën e bashkisë.