Partia Demokratike ka afruar në koalicionin opozitar një parti të re që drejtohet nga Arian Galdini. Ky bashkëpunim i ri habiti jo pak gazetarët, që me këtë rast mësuan edhe emrin e partisë së Galdinit.
“Opozita, koalicioni opozitar zgjerohet me një forcë të re politike. Modeli ynë qëndron në kontrast t thellë më kundërshtarin tonë, i cili ka investuar në veshjen e pushtetit me krim dhe krimin me pushtet, për t’ju thënë ja çfarë ju sjell demokracia, Rosh, Bush, Kokëdhimë. Por kjo nuk është demokracia, demokracia duhet te ketë fytyrën ëngjëllore të të rinjve tanë. Dua të mirëpres “Partinë për Liri Demokraci dhe Etikë”. Të tjera parti kanë shprehur interesin për tu bashkuar me PD. Dua të përsëris sot ftesën për këdo që ndihet në opozitë me të keqen të bashkojmë forcat, sepse së bashku mund dhe do t’ia dalim të ndalim të keqen, ta zmbrapsim të keqen dhe të hapim një erë të re.”- deklaroi Basha pas takimit në zyrën e tij me Galdinin.
Ndërkohë Arian Galdini habiti akoma më shumë gazetarët me deklaratën e tij. Ai zbardhi një detaj që nuk dihej deri sot, Arian Galdini ka ndryshuar mbiemrin.
“Unë jam Arian Saliaj, i biri i pëllumbit dhe Teutës, mbiemrin e kam ndryshuar, i lashë shenjat e gishtave në ambasadën amerikane, jam i gatshëm të jem përballë publikut me të dy mbiemrat. Ndryshimi ka të bëjë me besimin tim.”, tha Galdini.
Në lidhje me këtë bashkëpunim të ri, Basha u vu në siklet nga gazetarët teksa u pyet se pse i duhej një parti që nuk ka vota.
Gazetarja: Pse ju duhet një parti që nuk ka vota?
Basha: “Keni filluar të nxirrni konkluzione të shpejta. PD nuk paragjykon askënd. Këtu nuk ka asnjë paragjykim, e aq më shumë për forca të reja politike”./a.m.
