Kreu i Partisë Demokratike ka deklaruar se është dakord për zhvillimin e zgjedhjeve lokale dhe të përgjithshme në të njëjtën ditë, por ndryshe nga propozimi Metës, nuk ka kërkuar që të zhvillohen edhe zgjedhjet për presidentin.
Nga Mati, ku ishte në një takim me strukturat e PD-së, Basha tha se nuk ka hequr dorë nga kushti i tij, largimi i Ramës nga posti i kryeministrit, sipas së cilit është e vetmja mënyrë për t’i hapur rrugë zgjedhjeve të lira e të ndershme, ndryshimit politik dhe zhvillimit ekonomik.
“Do të vazhdojmë me denoncimet dhe me protestat, si mjet për një nga qëllimet e pandryshuara të opozitës: zgjedhje të parakohshme parlamentare me qeveri tranzitore, pa Edi Ramën kryeministër dhe zgjedhje lokale legjitime në një ditë me zgjedhjet e parakohshme parlamentare.”– u shpreh kreu i opozitës në Mat.
Më herët, Presidenti Ilir Meta dha propozimin e tij për daljen e krizës, për të cilën duket se ka gjetur dakordësinë nga ana e kreut të PD-së, por jo plotësisht. Meta dekretoi 13 tetorin si datën e re të zgjedhjeve, por Basha tha se data nuk është problem më vete, por ato duhet të zhvillohen pa Ramën në krye të qeverisë dhe me një qeveri tranzitore.
