Tryezë politike për të mbërritur drejt konsensusit për Reformën në Drejtësi. Ky tashmë është vendimi iI PD-së, lidhur me hapat e mëtejshëm për miratimin e kësaj reforme, qëndrim ky që iu bë e ditur nga Kryetari i Partisë Demokratike, Lulzim Basha edhe Nënsekretarit të Shtetit për Çështje Europiane pranë Këshillit të Ministrave të Italisë, Sandro Goci. Në njoftimin për shtyp të PD-së dalë pas këtij takimi nënvizohet se, lidhur me Reformën në Drejtësi, sipas Bashës, “parakusht për të ecur përpara është dialogu politik që çon drejt konsensusit bazuar mbi kriteret e Venecias. Për këtë Partia Demokratike ka qenë, është dhe mbetet e qartë dhe e vendosur”.
Lidhur me zgjedhjet kreu i PD-së i ka bërë të ditur zyrtarit të lartë italian se “zgjedhje të lira dhe të ndershme janë sfida e rradhës për Shqipërinë”. Ai ka risjellë në vëmendje, sipas tij, gjetjet e raportit të OSBE/ODHIR-it, si përfshirjen në procesin zgjedhore të personave me rekorde kriminale, qoftë si kandidatë, qoftë si mbështetje kandidatësh si dhe fenomenin e blerjes së votave, kërcënimit të votuesve kryesisht punonjësit e administratës, etj. Në njoftimin për shtyp të PD-së thuhet se Nënsekretari Goci ka theksuar se shteti i së drejtës mbetet një moment kyç në vlerësimin që Bashkimin Europian bën ndaj Shqipërisë në procesin e integrimit. “Ajo është një kërkesë e panegociushme e BE, të cilën dhe Italia e mbështet plotësisht” theksoi zoti Goci, referuar deklaratës së PD-së.
(javanews.al) Me. Ar
