Kryetari i Partisë Demokratike, Lulzim Basha gjatë takimit me Presidentin e Kosovës, Hashim Thaçi, i cili ndodhet në një vizitë zyrtare në Tiranë, kërkoi që dialogu Kosovë-Serbi të zhvillohet mbi baza reciprociteti. Gjatë takimit presidenti Thaçi i shprehu mirënjohjen z. Basha për kontributet e padiskutueshme në mbështetje të Kosovës në të gjitha momentet e rëndësishme dhe jetike të saj.
Thaçi veçanërisht vlerësoi kontributin e kreut të PD-së në realizimin e projektit madhor të “Rrugës së Kombit”, e cila ka bashkuar shqiptarët, e ka bërë Kosovën partnerin kryesorë për eksporte, si dhe u ka dhënë mundësi mbi 1 milionë shqiptarëve të Kosovës të pushojnë çdo verë në Shqipëri, duke sjellë të ardhura në turizëm.
Bashkëbiseduesit theksuan domosdoshmërinë për më shumë mbështetje dhe aktivizim të përqëndruar të diplomacisë shqiptare në ndihmë të Kosovës, në procesin e njohjeve nga vende që ende nuk e kanë bërë atë dhe sidomos të anëtarësimit të Kosovës në organizatat ndërkombëtare.
Kreu i PD-së nga ana e tij vlerësoi të gjithë aktivitetin e z. Thaçi si drejtues i luftës çlirimtare, kryetar i opozitës dhe kryeministër gjatë tranzicionit dhe ngritjes së shtetit të Kosovës, dhe sot si kreu i shtetit sovran të Kosovës.
Kryetari demokrat e garantoi presidentin Thaçi se ndihma e mbështetja për Kosovën është e do të jetë e plotë dhe e parezervuar në çdo fushë, pa rënë në pozita paternaliste, në mbështetje reale dhe jo në zëvendësim të rolit të institucioneve të Kosovës.
Në këtë kuadër është e domosdoshme të kemi qëndrime parimore dhe jo inferioritet në raportet me Serbinë, tha ai, duke nxitur zbatimin e marrëveshjeve të arritura dhe duke kërkuar zgjidhjen e të gjitha çështjeve të tjera përmes dialogut Kosovë-Serbi mbi baza reciprociteti.
Basha shprehu shqetësimin për një aktivizim jo të mjaftueshëm të diplomacisë së Tiranës në raport me nevojat e Kosovës, në fushën e aktivitetit diplomatik dhe theksoi se PD-ja do të angazhohet për të nxitur rritjen e energjive dhe në qartësimin e sjelljeve diplomatike në raport me Kosovën dhe proceset ndërkombëtare që ajo përballet.
Një vend të veçantë në takim zuri dhe situata e përkeqësuar e shqiptarëve që jetojnë në Luginën e Preshevës, për të cilin kreu i PD-së theksoi se është detyrim i dy shteteve tona, Shqipërisë e Kosovës, që të japin gjithë mbështetjen e duhur me vepra dhe jo me fjalë dhe të ndihmojnë në përmbushjen e nevojave dhe kërkesave legjitime të shqiptarëve atje.
ma.me
