Kryedemokrati Lulzim Basha ka takuar pasditen e sotme krerët e partive aleate në selinë blu, takim ky nga i cili kanë dalë me një deklaratë të përbashkët.
Në njoftimin e shpërndarë për mediat, PD thekson se Koalicioni Opozitar do të ngrehë kuvendet qytetare kudo në vend, duke paralajmëruar kështu shtrirjen e protestës përtej Tiranës.
Partia Demokratike thotë se kërkesa e opozitës për një qeveri teknike mbetet kusht për pjesëmarrjen në zgjedhje, ndërsa thekson se nuk do të lejohet asnjë proces zgjedhor që sipas saj do të manipulohet.
Ky reagim vjen pak orë pas takimit të Lulzim Bashës me ambasadorin amerikan Donald Lu ku mendohet se ky i fundit i ka kërkuar pjesëmarrjen në Kuvend dhe komisionet parlamentare.
Deklarata e plotë:
Në tryezën e sotme Koalicioni Opozitar vendosi ngritjen e Kuvendeve Qytetare Për Zgjedhjet e Lira dhe të Ndershme anembanë Shqipërisë, me përfaqësues të spikatur të komunitetit dhe të gjithë grupeve të interesit, si pjesë e Lëvizjes Popullore për zgjedhje të lira dhe të ndershme.
Koalicioni Opozitar ritaeksoi vendimin e marrë nga bashkimi popullor i 18 shkurtit se vetëm një qeveri teknike që do të zbatojë plotësisht dekriminalizimin, dhe do të angazhohet në luftën ndaj drogës, krimit dhe parave të paligjshme kriminale, mund të garantojë kushtet për zgjedhje të lira dhe të ndershme.
Koalicioni Opozitar shpreh vendosmërinë për të mos lejuar asnjë proces zgjedhor të manipuluar nga krimi në pushtet dhe paratë e drogës, dhe për të vazhduar deri në fitore betejën për zgjedhje të lira dhe të ndershme si interes jetik i Shqipërisë dhe shqiptarëve.
/b.d
