Kryetari i Partisë Demokratike, Lulzim Basha, kujton 26 vjetorin e futjes së shqiptarëve në ambasada dhe e konsideron si thyrjen e perdes së hekurt të regjimit diktatorial.
Nëpërmjet një postimi në statusin e tij Facebook, Basha shkruan:
“Si sot 26 vite më parë, shqiptarët thyen hekurat e izolimit dhe u futën nëpër ambasada, me shpresën e një jete më të mirë, më të denjë për vete dhe fëmijët e tyre. Fatkeqësisht, ndërsa përkujtojmë këtë moment të rëndësishëm të kthesës historike që mori vendi ynë, shqiptarët janë serish me sytë drejt emigrimit. 100 mijë shqiptarë kanë kërkuar azil në Gjermani, Holandë, Suedi e vende të tjera të Bashkimit Europian, 200 mijë shqiptarë kanë aplikuar për Lotarinë Amerikane”.
“Varfëria, papunësia, pasiguria, dhuna dhe terrori qeveritar, janë arsyet e emigrimit të sotëm. Në krye të vendit është qeveria më e korruptuar e 25 viteve demokraci, e lidhur me krimin dhe e mbushur me kriminelë qe ju zhvat shqiptareve 1 miliard euro ne vit. Por, ndryshe nga dje, ne kemi në dorë mjetet demokratike për të bërë ndryshimin që dëshiron shumica dërrmuese e shqiptarëve. 2 korriku është një thirrje qe të bashkohemi ashtu si 26 vite më parë për të larguar këtë regjim kriminal e të korruptuar e për t’u kthyer shqiptarëve shpresën e humbur”, shkruan Basha.
