Kandidati për kryetar bashkie i Dibrës, Sherefedin Shehu, së bashku me kryetarin e Partisë Demokratike, Lulzim Basha, u takuan me maturantë dhe studentë të Dibrës.
Kryetari i Partisë Demokratike, Basha, pasi degjoi shqetësimet e maturantëve, tha se “Nuk duan t’ia dinë, nuk u bëhet vonë se në çdo vend normal në qoftë se do të kishte ndodhur skandali që ka ndodhur këto 48 orë, minimumi ministri i Arsimit do të ishte larguar. Ne do të hedhim disa hapa konkretë në mbështetjen tuaj. Ne do të çojmë një grup deputetësh në Agjencinë Kombëtare të Provimeve për të parë konkretisht çfarë ka ndodhur, si ka ndodhur dhe pse ka ndodhur”.
“Me ardhjen tonë në pushtet çdo student apo studente do të mundë të studiojë me një tarifë të përballueshme, të subvencionuar në raste të caktuara nga shtetit. Askujt nuk do t’i mohohet e drejta për të studiuar”, tha Basha.
Kandidati për kryebashkiak, Sherefedin Shehu, tha se bashkia nën drejtimin e tij do të ketë në fond të veçantë për të rinjtë, të cilët do të jenë prioritarë për punët në bashki. Do të ngrihet edhe një fond ekselence si dhe do të mbështeten studentët në nevojë që s’paguajnë sot tarifën për universitete publike.
”Bashkia do të ketë edhe një fond që ekselencën që këtu në nivelin e ekselencës së mesme. Zyrat e bashkisë do të jenë tuajat sot ose nesër, ju do të jeni ata që do të jepni energjinë bashkisë, zhvillimit të qytetit, zhvillimit të Dibrës dhe ju do të jeni sipërmarrësit e nesërm të qytetit të Dibrës që të mos presim që ta ushqejnë të tjerët por t’i dalim zot vetes”, tha Shehu. /a.m.
