Kryetari i Partisë Demokratike Lulzim Basha mbajti fjalimin e radhës në çadrën e protestës para kryeministrisë. Edhe njëherë ai ripërsëriti vendosmërinë për t’i shkuar deri në fund protestës. Basha deklaroi se asnjë pazar politik nuk mund të mbyllë kauzën e opozitës për zgjedhje të lira dhe largimin e krimit nga pushteti siç tha ai.
Ai ripërsëriti deklaratat e forcës kur tha para militantëve të PD “Bashkohuni dhe goditini me grusht”.
“Kolosë të intelektit shqiptar po i bashkohen me thirrjet e tyre, ushtrisë së popullit të lirë që nuk e lëshojnë sheshin e lirisë, misioni ynë nis me zgjedhje të lira e të ndereshme, por nuk përfundon aty. Misioni ynë pëprfundon kur të kemi ngritur republikën e re të shqiptarëve. Kurrë më nuk do ketë kompromis me të drejtat e qytetarëve.
Ju e dini që partitë i kanë mbyllur kauzat me pazare të vogla. Unë ju premtoj se kjo nuk do ndodhë më. Se interesat e kësaj lëvizjeje janë mbi interesat e çdo partie, sepse janë interesat e Shqipërisë. Ndaj le të kujtojmë këtë mëngjes të tetë të përballjes tonë popullore, se ne nuk tërhiqemi. Rama hapi rrugë një qeverie të re për zgjedhdje të lira e të ndershme. Ne nuk kthehemi në parlamentin e krimit. Atje ku janë ulur kriminelët e kanë vendin vetëm ata që i sollën ata.
Nuk ka e nuk ka për të patur zgjedhje fasadë në këtë vend. PD ëshstë e vendosur t’i shkojë deri në fund vendimit qytetar. Zgjedhje me këtë qeveri nuk ka për të pasur. Kush nuk e ka dëgjuar, ta dëgjojë e t’i vërë gishtin kojkës, zgjedhje me këtë qeveri, zgjedhje me krimin nuk ka për të pasur kurrë më”, deklaroi Basha.
