Përmes një statusi në rrjetin social Kryetari i PD-së Lulzim Basha shkruan se Kryeministri Rama vazhdon të thellojë hendekun mes dy botëve, atë të qytetarëve të pamundur dhe tjetrën, ku qëndrojnë interesat korruptive të personave të lidhur me të. Basha sulmon edhe kreun e Bashkisë Erion Veliaj, kur thotë se ai po mbrohet nga Rama, pavarësisht se parku liqenit po shkallmohet me ndërtime abuzive. Po të njëjtën logjikë dhe argument, Basha e përdor edhe për deputetin e PS-së Armando Prenga apo për të tjerë deputetë si Koço Kokëdhima.
“Në botën e tij gëlon shkelja e ligjit, e kushtetutës, vjedhja e korrupsioni. Në këtë anë, janë strehuar hajdutët që vjedhin dhe spyesin për askënd. Në botën tjetër, janë qytetarët e pamundur, të cilët i kap ligji dhe represioni, edhe për një tjegull që vendosin në çati, edhe për një dritare që rregullojnë.
Në botën e Edi Ramës, është Erion Veliaj që shkallmon Parkun e Liqenit pa leje, që ndërton aty kafe dhe restorant për interesa korruptive.
Eshte Armando Prenga që pasi ka bërë kasaphanë me armë pa leje brenda komisariatit të policisë, sot shqyrton në parlament dekretet e Presidentit.
Janë Beqët e Ahmetajt që po zhvasin çdo ditë miliarda me koncesione. Eshte Tahiri, kumbari i trafikut të drogës. Eshte Kokëdhima që sundon Jugun.
Balla që kontrollon çdo emërim, licensë e tender nga Elbasani në Korcë. Një gjiriz i madh me shkelës ligji, me vjedhës, me të korruptuar”.- shkruan Basha.
Në këto kushte, lideri i opozitës thekson se protesta mbetet e vetmja zgjidhje për të kundërshtuar dhe për t’i bërë ballë korrupsionit qeveritar.
“Në botën e qytetarëve dhuna ndaj tyre shtohet çdo ditë. Burgu i pret të pamundurit, të cilët ndëshkohen pikërisht për varfërinë e tyre.
Kjo padrejtësi po çon cdo ditë në konflikt social. Këto dy botë nuk mund të pajtohen. E vetmja rrugë që i ka mbetur qytetarëve është të përballen me kampin e sunduesve të korruptuar. Të qëndrojnë përballë tyre. T’u rezistojnë me forcë dhunuesve, plackitësve.
Protestë, rezistencë, përballje. Kjo është rruga e qytetarëve. Ky është shpëtimi. Ndryshe vjedhja, korrupsioni, shkelja e ligjit, zhvatja e pasurive publike do të shtohen çdo ditë, do asfiksojnë vendin, do mbysin demokracinë.”- përfundon Basha.
