Kryetari i Partisë Demokratike Lulzim Basha ka reaguar pas takimit të kryeministrit Edi Rama me punjonjës të tatimeve dhe doganave. Në një konferencë për shtyp, Basha akuzoi kryeministrin se me deklaratën e sotme shpalli amnisti për kontrabandistët. Sipas tij rritja e taksave, ka nxitur rritjen e informalitetit.
“Edi Ramës nuk ja ndjen, nuk ka zgjidhje, nuk ka vullnet”, – tha Basha duke theksuar se me reformën e tij Rama nuk do të godasë biznesin e madh, por sipas tij në shënjestër të kryeministrit do të jetë biznesi i mesëm dhe ai i vogël.
Në këtë kuadër Basha tha se Partia Demokratike ka një plan për ta kthyer në zgjidhje për shqiptarët, duke e nisur me pastrimin e menjëhershëm të qeverisë nga krimi.
“Ne kemi një plan, kemi vendosmërinë që këtë plan ta kthejmë në zgjidhje për qytetarët shqiptarë. Kjo kërkon vendime të vështira, por unë, PD e opozita, bashkë me qytetarët e vendit, jemi gati t’i marrim këto vendime. Pastrimin e menjëhershëm të qeverisjes nga krimi, vendosjen e taksës së sheshtë më të ulët në Ballkan, transparencë dhe luftë kundër korrupsionit, barazi para ligjit e konkurrencë të ndershme. Por, më parë se të gjitha, pastrimin e menjëhershëm të qeverisjes nga krimi”, tha Basha.
