Kryetari i Partisë Demokratike, Lulzim Basha, ka akuzuar qeverinë se ka miratuar uljen e buxhetit me afro 163 milion dollarë në mënyrë jo transparente, madje në fshehtësi nga qytetarët dhe mediat.
Kryetari i Partisë Demokratike, Basha, ka reaguar paraditen e të enjtes në statusit të tij Facebook, duke u shprehur se “Në fshehtësi të plotë nga qytetarët dhe media, qeveria ka miratuar natën e 29 korrikut uljen e buxhetit të shtetit me afro 163 milion dollarë. Të nesermen Rama mbajti një monolog dy orësh për ekonomine që po rritet, papunësine qe po bie ne grupin parlamentar te PS-së. Por, asnjë fjalë për vendimin që kishte firmosur 12 orë më parë për të shkurtuar fondet e pagave dhe pensioneve dhe për të ulur investimet në shkolla, rrugë, ujesjelles dhe bujqësi”.
Basha në një postim të dytë në statusin e tij Facebook, shton se “Pa ju dridhur dora, qeveria shkurtoi 960 milionë lekë (-74%) nga fondi i pagave për arsimtarët, mjekët, infermieret, ushtarakët, policët dhe të gjithë punonjësit e administratës publike. Shkurtuan me 200 milionë lekë (-20%) asistencën për të papunët, ndërkohë që papunesia rritet perdite. Shkurtuan me 2 miliardë lekë (-67%) kreditimin për energjinë, ndërkohë që ndërprerja e energjisë ka pllakosur vendin e në veçanti zonat turistike. Shkurtuan me 2.67 miliardë lekë investimet në ujesjellës-kanalizime (18%), 1.3 miliardë lekë investimet në arsimin e mesëm (-36%), 520 milionë lekë investimet në ujitje dhe kullim (-26%), 1.79 miliardë lekë investimet në rrugë (8.7%)”.
“Vjedhin taksat dhe doganat për vete dhe shkurtojnë fondet për qytetarët”, përfundon Basha.
