Kryetari i Partisë Demokratike, Lulzim Basha ka pritur në një takim kreun e BDI në Maqedoni, Ali Ahmeti.
Basha theksoi rëndësinë e bashkëpunimit të forcave politike shqiptare në Maqedoni gjë që do të ndikonte në çuarjen përpara të të drejtave të shqiptarëve atje në realizimin e të drejtave dhe detyrimeve të papërmbushura të Marrëveshjes së Ohrit, në veçanti çështja e gjuhës.
Kryetari i Partisë Demokratike shprehu bindjen se përfshirja e shqiptarëve në qeverisjen e ardhshme të Maqedonisë duhet të garantojë zbatimin e Marrëveshjes së Ohrit dhe respektimin e plotë të lirive, të drejtave dhe barazisë së shqiptarëve si dhe të ndihmojë në pershpejtimin e anëtarësimit të Maqedonisë në NATO si garanci për stabilitetin dhe për të drejtat e shqiptarëve.
“Pata nderin dhe kënaqësinë të prisja dhe bisedoja me kryetarin e BDI z. Ali Ahmeti. Shkëmbyem mendime për problemet politike të ditës. I shpreha Zotit Ahmeti bindjen se përfshirja e shqiptarëve në qeverisjen e ardhshme te Maqedonise duhet të garantojë zbatimin e Marrëveshjes së Ohrit dhe respektimin e plotë të lirive, të drejtave dhe barazisë së shqiptarëve si dhe te ndihmoje ne pershpejtimin e anetaresimit te Maqedonise ne NATO”, shkruan Basha në Facebook.
