Kreu i Partisë Demokratike, Lulzim Basha përmes një deklarate për mediat ditën e sotme ka kritikuar rëndë bllokimin e hetimit të çështjes CEZ një ditë më parë në Kuvend, ku shumica votoi që të mos ketë një hetim për akuzat e ngritura nga opozita. Sipas tij, mbrëmë Ram e shpalli veten të pahetueshëm, duke ndaluar me ligj hetimin e aferës më të madhe korruptive.
“Dje Rama e shpalli veten të pahetueshëm lidhur me çështjen e CEZ, pasi me shumicë votash rrëzoi kërkesën e opozitës. Dje u vendos standardi më i zi në Parlament, ku të gjithë mund të hetohen, përveç Ramës. Kjo aferë nuk mbyllet me kaq. Mos hapni shampanjë për të festuar për herë të dytë vjedhjen e 600 milionë eurove. Nuk do e ndalin dot kurrë të vërtetën për ligj, transparencë dhe drejtësi. Me aktin e djeshëm Rama provoi se është në krye të kësaj afere, së bashku me hipokrizinë e Metës”, u shpreh Basha. Ai ka nënvizuar se, e gjithë kjo bëhet për një grusht njerëzish, që sipas tij i janë vërsulur investimeve, shpenzimeve publike, tenderave dhe konçesioneve. Duke premtuar shfuqizimin e ligjit që burgos fshatarët dhe fermerët, si dhe të ligjit që sipas PD shpronëson për herë të dytë ppronarët, Basha ka bërë apel për një pjesëmarrje sa më masive në protestën e 8 dhjetorit.
“Dje ndaluat të vërtetën, por nuk do të ndaloni dot marshimin e qytetarëve. Thërras shqiptarët, pa dallime politike, që më 8 dhjetor të protestojmë kundër kësaj klike të korruptuar. Ftoj edhe studentët, të cilëve u them se më 8 dhjetor do të protestojmë edhe kundër ligjit për arsimin e lartë”, ka thënë Basha. Në fund të deklaratës, kreu i demokratëve ka kritikuar ashpër edhe buxhetin 2016 të miratuar në Parlament, të cilin e ka cilësuar si “buxheti i torturës fizike dhe psikologjike”. “Ndaj 8 dhjetori është dita e të gjithë shqiptarëve, të goditur nga dyfytyrësia e Ramës dhe Metës”, ka shtuar Basha.
