Kryetari i Partisë Demokratike Lulzim Basha ka reaguar pas protestës së sotme që zhvilloi biznesi i vogël për të kundërshtuar vendosjen e tyre në skemën e TVSH-së.
Përmes një statusi në rrjetet sociale, Basha shkruan se kjo është goditje që i bëhet biznesit.
Sipas kreut të PD, kjo masë e ndërmarrë nga qeveria ka dy arsye private që lidhen me favorizimin e oligarkëve sipas tij dhe krijimin e kushteve për konçesionin privat të TVSH-së.
Statusi i Bashës:
Futja e biznesit të vogël në TVSH është goditje që i bëhet biznesit, ekonomisë, dhe vetë Shqipërisë. Sipërmarrësit e vegjël janë motori i çdo ekonomie dhe shoqërie: ata krijonë punësim, ata sjellin zhvillim, ata sjellin mirëqenie.
Nuk ka asnjë arsye ekonomike, asnjë arsye publike për vendimin e Edi Ramës kundër biznesit të vogël. Ka vetëm dy arsye private: favorizimi i oligarkëve dhe krijimi i kushteve për koncesionin privat të TVSH-së.
Sipërmarrësit e vegjël treguan sot në mbarë vendin se ata nuk do të heshtin para arbitraritetit, nuk do të lejojnë që bizneset dhe mundi i tyre të grabitet nga Edi Rama dhe klientët e tij.
Ata duan një Shqipëri ku ka mundësi, ku ka konkurencë të ndershme, ku ka drejtësi.
Kjo Shqipëri do të jetë realitet vetëm kur politika të mos jetë e kapur, kur Shqipëria të çlirohet nga oligarkia politike dhe ekonomike.
Ky është vizioni dhe vullneti i Partisë Demokratike.
/a.m.
