Basha paralajmëron ndryshime në PD: Do jetë një parti e qytetarëve, jo makiazh

Lulzim Basha ka lajmëruar për mbylljen e një procesi të gjatë të bërë brenda Partisë Demokratike, duke thënë se PD është pranë një ndryshimi të madh, në thelb të të cilës do të jetë kufizimi i pushtetit, dhënia e më shumë vendimarrjeje grupit parlamentar dhe më shumë rëndësi qytetarëve. I pyetur nëse ky ndryshim do të prekë dhe ata deputetë që janë shfaqur haptazi kritika ndaj tij, Basha është shprehur se në hapjen e PD-së, ka vend për të gjithë ata që mendojnë ndryshe nga ai.

Vetëm 6 muaj para zgjedhjeve, Basha është shprehur se hapja e PD-së do të jetë konkrete dhe jo një makiazh.

“Nuk kanë qenë të pakta mesazhet e dyshimit dhe pasigurisë, e kuptoj dyshimin e një shoqërie të zhgënjyer thellësisht me politikën, se në të shkuarën edhe kur ka lindur një dritë shprese është shuar. Dua t’i siguroj ata se ndryshimi i PD, hapja e saj, do të jenë të vërteta të besueshme dhe të pakthyeshme.

Makiazhet apo gjërat e lëna përgjysmë do minonin besueshmërine PD por edhe shanset për një nderyshim pozitiv në Shqipëri. Do ndërtojmë së bashku me ta një proces që jep garanci të plota se ndryshimi do jetë i vërtetë, ku mund të besojnë dhe mbështeten për të përmirësuar jetën e cdokujt në Shqipëri.

Procesi do jetë i vështirë, udhëtimi ynë do jetë i vështirë, i sulmuar dhe anatemuar nga elitat që kontrollojnë ekonominë, median, por jam i bindur e bashkë me shqiptarët do ja dalim që PD të kthehet në lumin e shpresës, mundësive se në thelb ajo që do ndërtojmë është një Shqipëri që jo ndërton mundësi për një grusht njerëzish që duan të ruajnë statuskunë, por ofron shanse për të gjithë.

Do përfshihen të gjithë, është një proces që ka për qëllim hapjen e PD për këdo që është gati dhe do të japë kontributin e tij dhe të saj për një udhëtim që ka për pikëmbërritje jo thjesht e vetëm një rrotacion politik por një politikë në shërbim të njerëzve dhe jo të elitës.

Ndryshimin do e nisim brenda PD-së, do e nisim duke e bërë PD një parti të shqiptarëve dhe jo drejtuesish që kanë për qëllim ardhjen e tyre në pushtet. Po kështu, nesër do ndryshojmë Shqipërinë. Sot u diskutua gjerësisht në grupin parlamentar dhe presim zhvillime në javët në vazhdim për ti paraprirë aksionit tonë politik”,- tha Basha.

Në lidhje me zgjedhjet në Kolonjë Basha tha:

“Për Kolonjën mund tju them se vetëm se kushdo që kërkonte një prove tjetër, ja ku e ka. Historikisht një zonë ku e majta ka qenë e avantazhuar, por as atje nuk ju përmbajtën dot shitblerjes së votës”