Lulzim Basha, ‘armiku’ i Berishës që prej kohës që e përjashtoi nga grupi parlamentar i PD, është ftuar për forumin e partive të djathta në SHBA që do të nisë më 6 dhjetor. Po në këtë datë, Sali Berisha ka paralajmëruar protestë ndonëse do të jetë ditë historike për Tiranën pasi mbërrijnë liderët europianë për samitin e BE.
Ditën e sotme, ish-kryedemokrati së bashku me Fatmir Mediun, Agron Shehajn dhe Oriola Pampurin do të udhëtojnë drejt Shteteve të Bashkuara të Amerikës për takimin e IDU, partive të djathta për forumin që do të zgjasë deri me datë 9 dhjetor në Washington. Deputetët kanë marrë ftesë si pjesë e partive të djathta por nuk kanë të drejtë vote për shkak të statusit të pezulluar të PD.
Ndonëse asnjëherë nuk i është përgjigjur Sali Berishës për akuzat se nuk merr dot vizë, Lulzim Basha po udhëton për herë të dytë drejt SHBA brenda një kohe të shkurtër. Më 14 tetor u fotografua pranë Presidentes së BERZH-it, Renaud-Basso në Qendrën Amerikane për Studime Strategjike.
Pikërisht më 6 dhjetor, ditën kur të gjithë liderët e Ballkanit do të mblidhen në vendin tonë ish-Kryeministri Sali Berisha ka nënvizuar ditët e fundit se do të organizojë protestën e radhës, duke thënë se ky do të ishte një rast historik që qytetarët me anë të një proteste paqësore të ngrinin zërin e tyre kundër qeverisjes aktuale.
/a.r
