Kryetari i Partisë Demokratike, Lulzim Basha zhvilloi të martën një takim me misionin e Fondit Monetar Ndërkombëtar, i cili ndodhet prej disa ditësh në Tiranë, ku tha se ka diskutuar mbi situatën ekonomike në vend, ndërsa iu ka paraqitur edhe planin e forcës politike që ai drejton për nxjerrjen e vendit nga kriza.
Basha tha se krahas prezantimit të planit, PD kishte denoncuar edhe korrupsionin, evazionin e kontrabandën që kjo qeveri ka kryer e që sipas tij, i kushtojnë qytetarëve rreth 1 miliard euro në vit.
“Ne i treguam Fondit Monetar Ndërkombëtar planin tonë për nxjerrjen e vendit nga kriza, që parashikon vendosjen e taksës së sheshtë prej 9 %, duke hequr dorë nga taksa progresive që rëndon më të varfrit( %, uljen e TVSH nga 20 në 15 %”, tha Basha.
Sipas tij, pavarësisht rritjes së taksave, Shqipëria humbet 1 miliard euro në vit përmes vjedhjes e shpërdorimit, para këto që përfundojnë si pasuri në xhepat e zyrtarëve të korruptuar. “Kjo është rezerva e artë që PD do të përdorë në planin e saj për nxjerrjen e vendit nga kriza si dhe 46 % të shqiptarëve nga varfëria”, deklaroi Basha.
Plani ynë, vijoi Basha i jep fund abuzivizmit të taksidarëve me qytetarët. Në planin për nxjerrjen nga kriza të vendit, parashikohet tha Basha edhe anullimi në bllok i koncesioneve, si dhe fokusimi i shpenzimeve drejt qytetarëve përmes investimeve që zhvillojnë vendin e hapin vende puna./a.k
