Basha në Shkodër: Problemi ynë varfëria, i mazhorancës është Basha

Shkodra ka qenë ndalesa e radhës e kreut të Partisë Demokratike Lulzim Basha në turin e bashkëbisedimeve me të rinjtë. Në fjalën e tij, nuk kishin si të mungonin akuzat për qeverinë. 
Sipas kreut të demokratëve kjo qeveri e ka zhytur vendin në gropën e papunësisë, ndërkohë që nuk ka projekt për rimëkëmbje. Për Bashën, ky është problemi që shqetëson opozitën dhe qytetarët, ndërsa sipas tij problemi i mazhorancës është vetë ai.
“Problemi i tyre është Basha. Problemi im është rënia ekonomike, rënia e fuqisë blerëse, rritja e taksave, rritja e çmimeve, pamundësia për të mbyllur muajin, papunësia rinore, papunësia në tërësi. Po unë do të uroja që ai të luftonte me të njejtën fuqi që më lufton mua, papunësinë. Të lufonte me të njejtin prioritet që lufton kryetarin e opozitës, varfërinë. Të luftonte pagat e ulta, pensionet e ulta me të njejtën forcë që sulmon, shpif dhe fajëson këdo, përveç vetes së tij.” tha Basha