EKSKLUZIVE / Vizita që kryetari i PD-së, Lulzim Basha pritet të zhvillojë në mes të muajit mars në SHBA, duket se është frut i një kompromisi mes zyrtarëve më të lartë amerikanë, në Tiranë dhe atyre në Washington, në këmbim të votave që PD-ja duhet të japë në Kuvend për Reformën në Drejtësi.
Burime të besueshme brenda selisë qëndrore të demokratëve bën të ditur për JAVANEWS se kjo vizitë është e mirëmenduar dhe e dakortësuar me nivele të larta amerikane, ku nga njëra anë Washingtoni do të “hapë dyert” për të pritur Bashën në Departamentin e Shtetit, dhe nga ana tjetër Basha është zotuar që të mbështesë me vota në Kuvend draftin për Reformën në Drejtësi.
Po të njëjtat burime bëjnë të ditur se në harkun kohor të 10 ditëshit të fundit të muajit mars, pritet që të mundësohet edhe votimi në Kuvend i Reformës në Drejtësi me votat e mazhorancës dhe opozitës. Por përtej kësaj mbetet ende për t’u parë nëse Basha do të mbajë fjalën përpara zyrtarëve të lartë amerikan që të votojë Reformën në Drejtësi, apo do të bëjë të njëjtën lëvizje që bëri edhe në rastin e Byrosë së Hetimit, ku nga njëra anë i prentoi ambasadorit amerikan në Tiranë, Donald Lu se PD-ja është e gatshme që të votojë Byronë e Hetimit dhe nga ana tjetër kur drafti i dakortësuar mbërriti në Kuvend, ai “ktheu pllakën” duke deklaruar se nuk e voton draftin në fjalë.
Për kryetarin e PD-së, Lulzim Basha, kjo është vizita e parë zyrtare që ai bën në SHBA ku pritet të ketë disa takime të rëndësishme në Departamentin Amerikan të Shtetit dhe më pas edhe me disa kongresmenë. Kjo vizitë shihet nga PD-ja edhe si një mundësi për të riparuar marrdhëniet shpesh herë të acaruara mes PD-së dhe DASH, po të kihet parasysh se në jo pak raste krerët e PD-së kanë qenë në vijën e parë të sulmeve ndaj përfaqësuesve zyrtarë të politikës amerikane në Tiranë.
Janë tashmë të njohura marrdhëniet problematike të ish- kryetarit të PD-së Berisha, thuajse me të gjithë ambasadorët amerikanë në Tiranë. Në këtë vizitë Basha do të shoqërohet nga deputetët Jorida Tabaku, Gent Strazimiri dhe Eduard Selami, si dhe nga këshilltari për marrëdhëniet me Jashtë, ish-ambasadori, Mal Berisha. Zyrtarisht takimet e Bashës nisin me 15 deri 20 mars. / javanews.al
