Lulzim Basha në takime me banorë të Peqinit. S’ka marrëveshje me zullumin. Kam plan ekonomik që ndez ekonominë, sjell punë, prodhim, mirëqënie.
Gjatë takimit me banorë të Peqinit, Lulzim Basha ka treguar efektet që do të sjellë plani i tij ekonomik, duke i sqaruar njerëzit nga afër, ndërsa shtoi se s’do të ketë marrëveshje me “Republikën e vjetër”.
“Jo koalicion me Edi Ramën, se i ka mbetur në mendje. E keni parë që thotë: Është çun i mirë Luli, është çun i mirë Luli, mbaj fotografinë e Lulit, po pse kë do mbajnë tënden? 300 mijë vende pune i bëre 300 mijë refugjatë. Shëndetësinë falas e fute në gropë. Tani, nga mëngjesi deri në darkë Luli, Luli, Luli, thua se është shoku im. Ne do ta mundim, nuk e lë më asnjë ditë në Republikën e vjetër”, u shpreh Basha.
Kreu i opozitës u foli qytetarëve për masat konkrete të planit të tij.
“Do të vendosim këtë pullën dhe po u kap inspektor këtu do ta pijë e zeza, do të shkojë në Prokurori. Nuk do të shkojnë më paratë as për koncesione, as për pllaka, as për palma, por te brezi i ri dhe shtresat në nevojë. Por që të ndodhë kjo duhet të kemi biznesin e fortë, duhet të kemi ekonominë e fortë”, tha Basha, duke theksuar garancinë që do japë pulla fiskale.
Mesazhi i Lulzim Bashës për qytetarët, një javë para zgjedhjeve, është i qartë.
“Ju shoh të bashkuar, ju shoh të vendosur për atë që do të ndodhë më 25 qershor. Ndahemi nga krimi dhe kriminelët në politikë në radhë të parë. Do të marrin fund kriminelët në politikë, s’ka për të pasur më kriminelë në politikë. Ata që i rren mendja ta dinë mirë se i kanë orët e numëruara. Vendimi është marrë. Kemi ekipin, kemi planin, kemi vendosmërinë dhe do ta çojmë deri në fund. Mos lini derë pa trokitur, pa u çuar lajmin njerëzve. Republika e vjetër ka marrë fund, është marrë vendimi”./a.ç
