Kryetari i Partisë Demokratike Lulzim Basha zhvilloi takime me banorë të Klosit dhe Bulqizës, ku shprehu bindjen se shqiptarët do të votojnë për projektin e shpresës dhe zhvillimit.
Ai e cilësoi dëshpëruese përpjekjen e maxhorancës për të diktuar përmes presionit dhe terrorit votën e 21 qershorit. Shqiptarët, tha Basha e kanë zgjedhur rrugën e tyre, duke i thënë jo mashtrimit, jo terrorit, jo dhunës.
“21 qershori është festa e demokracisë, betejën e 21 qershorit nuk e vendosin të korruptuarit, nuk e vendosin banditët. Fatin e 21 qershorit e vendosni ju me votën tuaj. Është votë për të hequr kërbaçin nga dora abuzive e qeverisë, pra është votë për punë, është votë për dinjitet. Jepjani votat platformës sonë, sepse para se të jetë platformë politike është platforma e shpëtimit, është platforma e bukës së gojës, është platforma e punës dhe dinjitetit për çdo banor e banore të Klosit dhe Shqipërisë”, tha ai.
Sipas tij, qeverisja aktuale premtoi 300 mijë vende pune por mbylli mijëra vende pune, premtoi ulje taksash por i rritën ato, premtoi ulje të çmimit të energjisë por e rritën atë. Kjo është arsyeja, theksoi kryetari i Partisë Demokratike, që dyshja Rama – Meta ka frikë nga vota e popullit, nga ndëshkimi i tyre.
“Vota juaj është ligji suprem, vota juaj është ligj i ligjit. Bëjeni ligjin me votën tuaj, në 21 qershor. Votoni për PD-në, votoni për uljen e menjëhershme të çmimit të energjisë me 25%, faljen e kamatë-vonesave, uljen e taksave në nivelin më të ulët në Ballkan, rritjen e rrogave e pensioneve, uljen e menjëhershme me 20% përmes eliminimit të TVSH, të mallrave të shportës, të miellit, orizit, sheqerit, vajit, qumështit, bukës, sepse kohët janë mjaft të vështira për shqiptarët dhe ka nevojë për ndërhyrje urgjente, ka nevojë për shpresë e shpëtim të menjëhershëm.”
