Kryetari i Partisë Demokratike, Lulzim Basha, ka bërë të ditur se roli i misionit ndërkombëtar do të jetë vetëm rekomandues, ndërsa marrja e vendimeve do të bëhet vetëm nga shqiptarët. Basha e ka quajtur një betejë të fituar dhe thotë se në këto kushte PD do ta votojë nesër për Reformën në Drejtësi.
Basha deklaroi se pas komunikimit me partnerët ndërkombëtarë dhe me rakordimin e eurokomisionerit Johanes Hahn është arritur që roli i ndërkombëtarëve në procesin e vetingut të jetë rekomandues dhe se vendimmarrja mbetet në duart e kushtetutës shqiptare.
“Sapo kam përfunduar një komunikim intensiv me partnerët europianë dhe amerikanë dha jam para jush për të ndarë lajmin e mirë. Pas komunikimit të fundit të rakorduar nga komisionari Hahn, roli i ndërkombëtarëve rekomandues, vendimmarrja mbetet në duart e kushtetutës shqiptare. Nuk do të përjashtohet asnjë qytetar nga konkurrimi mbi bazën e opinioneve por vetëm mbi bazën e fakteve dhe provave. Konkludimi i këtyre 2 çështjeve të lëna si litarë jashtë në negociatat e së hënës është edhe konkludimi i betejës së PD”, deklaroi Basha.
Ai theksoi se kjo betejë e fundit ka patur 2 qëllime” të mbrojë kushtetueshmërinë, parimin e shenjtë se askush nuk mund të ketë pushtet pa patur llogaridhënie; ka patur në qendër të saj të drejtat dhe liritë e njeriut si ADN-ja e PD-së, i krijimit të saj dhe qëndrimit të saj. “Nuk mund të presim dhe as nuk kërkojmë dot që Europa të na trajtojë si të barabartë nëse e trajtojmë veten më ulët. Kemi bërë këtë betejë, pas shumë e shumë betejash të tjera të fituara e të mishëruara në një draft të standardeve evropianët dhe atlantike, të mishëruar me opinionin e Venecias. Beteja ja vlejti!”, tha kreu i opozitës.
Basha theksoi se qëndresa e PD është bazuar në bindjen se shqiptarët meritojnë një standard evropian dhe se partnerët nuk do të pranonin asgjë jashtë këtyre standardeve.
“Shumë miq kanë pyetur dhe kanë shtruar me admirim ose pikëpyetje se cili ishte motivimi për këtë betejë, ju them se qëndresa jonë dhe besimi im i palëkundur në një arritje pozitive bazohej në 2 pika: Së pari se shqiptarët meritojnë një standard evropian. Kjo është bindja ime e thellë personale, si një njeri i ekspozuar ndaj këtyre vlerave perëndimore; Bindja ime e dytë ka qenë se partnerët tanë të çmuar, aleati ynë strategjik SHBA-të, dhe BE-ja nuk do të pranonin kurrë asgjë më pak se standardet e vendeve të tyre”.
“Ndaj nuk jam lëkundur në asnjë çast, jo për kryeneçësi as për populizëm. Të hiqja dorë nga këto 2 parime do të thoshte se të hiqja dorë nga vetja ime. Kjo betejë sot përmbushet me një fitore. Jo fitoren e Lulzim Bashës dhe as të PD-së, por të çdo shqiptari, duke nisur nga kryeministri deri tek çdo qytetar, si të barabartë para ligjit”, tha Basha.
d.i.
