Kryetari i Partisë Demokratike, Lulzim Basha, shprehu mirënjohjen për 13 protestuesit tek parku i Liqenit, të cilët u liruan mbrëmjen e sotme. Basha thotë se ata lanë qelitë por janë ende të vendosur të vazhdojnë me forcë betejën me tiraninë.
“13 burra e të rinj demokratë që u ngritën për të mbrojtur parkun e ligjin, që u dhunuan brutalisht dhe u rrëmbyen me policë me maska, e u mbajtën 3 ditë në arrest të paligjshëm, dolën të lirë, më të vendosur e më me shumë energji për ti shërbyer kësaj kauze të qytetit, të vendit dhe demokracisë. Në sytë e në zërin e këtyre burrave ka vetëm vendosmëri dhe entuziazëm për të vazhduar me forcë betejën me tiraninë. Mirënjohje të thellë dhe nderim për Cim Babasin, Arlind Kajon, Behar Hasen, Erion Dizdarin, Franc Doken, Gerald Metkon, Grigels Muçollarin, Indrit Hoxhen, Jurgen Kupin, Klejt Kalane, Silvio Shemen, Soven Shemen dhe Tonin Kolthin”,- shprehet Basha.
Basha thotë se bashkë me ta janë sot demokratët dhe qytetarët, deri në largimin e qeverisë. “Këta trima të kurajos dhe burrërisë qytetare nuk kanë qenë të vetëm për asnjë sekondë. Dhe sot bashkë me demokratët e mbarë qytetarët e vendit jemi më të bashkuar e në shumicë absolute për të mbrojtur qytetin, ligjin, demokracinë para oligarkisë dhe bandës në ikje”.
BW
