Në 25 vjetorin e themelimit të degës së PD në Korçë, kreu i opozitës Lulzim Basha ka marrë “flamurin” e reformës në drejtësi, duke thënë se është PD ajo që udhëheq dhe drejton këtë të fundit. Ky entuziazëm i kreut të PD Basha vjen fill pas publikimit të raportit të Komisionit të Venecias për draftin në reformën e drejtësisë si dhe pas takimit me ambasadorin e SHBA Donald Lu.
“Tashmë, siç u faktua edhe dje, Partia Demokratike drejton dhe udhëheq reformën në drejtësi. Ne nuk kemi vetëm denoncimin, ne kemi alternativën, kemi platformën tonë. Testi i parë se platforma funksionon është Edi Rama, i cili për faktin që nuk merr vesh nga ekonomia, nuk di as ta kopjojë e jo më ta zbatojë”-tha Basha.
Duke ju referuar dekriminalizimit, Basha tha se pavarësisht se qeveria e vonoi një vit atë, përsëri PD ja arrit që të sjellë dhe të kryejë ‘reformën më të madhe në vend”.
“Ne si opozitë vijmë me reformën më të madhe në këtë vend, reformën për dekriminalizimin. Një vit më parë i ulëm dhe i detyruam me faktorin ndërkombëtar të nënshkruajmë marrëveshjen. E vonuan një vit. Bënë ç’të mundeshin, por s’e ndalën dot”, tha Basha.
kryeopozitari Basha është ndalur në kritikat ndaj qeverisjes aktuale të drejtuar nga Rama dhe Meta, për të cilën thotë se, nga selia blu e kishin parashikuar që dy vite më parë se çfarë do të prodhonte kjo mazhorancë.
“400 milionë lekë kanë vjedhur në dogana e tatime, 700 milionë të tjera nga tenderat, që përfundojnë në xhepat e Ramës dhe hajdutëve të tjerë. Në Shqipëri nuk ka shkolla, rrugë, spitale të reja, nuk ka rritje pagash dhe pensionesh, nuk ka rritje të ndihmës ekonomike, nuk ka subvencione, sepse paratë përfundojnë në xhepat e qeveritarëve”, është shprehur Basha.
Nga Korça, Basha i është rikthyer edhe një akuze të vjetër, asaj të vjedhjes së votave, duke akuzuar mazhorancën aktuale se kërkon të kapë me çdo kusht edhe institucionin e fundit të llogaridhënies, votën e lirë.
“E testuan në zgjedhjet vendore në Korçë dhe e shtrinë më 21 qershor në të gjithë Shqipërinë. Kjo qeveri, në dy vite nuk ka çfarë të tregojë, sepse s’ka asnjë reformë, asnjë arritje, por vetëm 1.2 miliardë dollarë të vjedhura”, u shpreh Basha.
