Kryedemokrati Basha ndodhet në Londër, ku gjatë një takimi që pati me komunitetin shqiptar atje, tha se beteja e opozitës sot, ka për qëllim që t’i japë fund tranzicionit 30-vjeçar.
“Rrugëtimi që kemi nisur do t’i çojë shqiptarët drejt një ndryshimi historik, kudo që ata jetojnë. Kjo përbën një frymëzim për mua, PD-në dhe opozitën shqiptare. Ka një padurim më të madh që ndryshimi të vijë një orë më parë.
Ka një shpresë e madhe se ajo që po vjen nuk është thjesht një ndryshim politik i rradhës, por mbi të gjitha fundi i një tranzicioni prej 3 dekadash”, tha Basha.
Ai shtoi se “ardhja e standardeve britanike të drejtësisë, të mundësive për të gjithë dhe mirëqënies së garantuar prej punës së ndershme dhe konkurrencës. Kjo është beteja që bëjmë sot”.
Sa i përket proceseve integruese të Shqipërisë, Basha u shpreh se vendi mbetet shumë pas.
“Po na parakalojnë të gjitha vendet njëra pas tjetrës, ka gjasa që të na kalojë edhe Maqedoninë Veriut. Si ka mundësi që 30 vite kanë kaluar dhe akoma demokracia të vihet në pikëpyetje, jo më nga një bllok i madh ushtarako politik, as nga një diktaturë, por një grusht oligarkësh të bërë njësh me qeverinë. Duke shkatërruar demokracinë , ky grup ka marrë peng institucionet dhe parlamentin”, shtoi Basha.
/a.rada
